ᓄᖑᑎᕆᓂᖅ ᖃᕆᑕᐅᔭᑎᒍᑦ ᐊᑦᔨᒌᖕᖏᒍᑎᒥᒃ: KRG-ᑯᑦ ᐊᑐᓕᕐᑎᓯᓯᔪᑦ Starlink ᑲᑕᖓᓄᑦ ᐱᑐᒍᑎᒥᒃ ᓱᑲᑦᑐᔭᒥᒃ ᖃᕆᑕᐅᔦᑦ ᐱᑐᕝᕕᖓᓂᒃ ᐊᑐᕈᓐᓇᓯᒍᑕᐅᑎᓪᓗᒍ ᐅᖓᕙᒥ
ᐅᖓᕙᒥ ᓄᓇᓕᓐᓂᒃ ᐱᑐᑦᑎᓯᖕᖏᓂᕐᒥᓂ ᓱᑲᑦᑐᒧᑦ, ᐊᖏᔪᓕᒐᕐᑐᒧᑦ EAUFON ᐃᕙᓘᔭᓄᑦ ᐱᑐᑦᓯᒪᐅᑎᖓᓄᑦ ᐊᕐᕋᒎᒃ ᒪᕐᕈᒐᓛᒃ ᓈᓕᕐᐸᑎᒃ, KRG-ᑯᑦ, ᐊᕐᖁᑎᖃᕐᓱᑎᒃ ᑕᒫᓂ ᖃᕆᑕᐅᔦᑦ ᐱᑐᑦᓯᒪᐅᑎᖓᓂᒃ, ᐋᕐᕿᓱᐃᓕᕐᑐᑦ ᒫᓐᓇᓯᐅᑎᒥᒃ ᐋᕐᕿᕈᑎᒥᒃ ᓱᑲᓯᑎᑦᓯᓱᑎᒃ ᑐᓂᔨᓂᕐᒥᒃ ᓱᑲᑦᑐᒥᒃ, ᓂᑲᓇᕋᓂᓗ ᐱᑐᑦᓯᒪᕕᒻᒧᑦ ᐱᒍᑦᔨᐅᑎᒥᒃ.
ᐅᓪᓗᒥ, KRG-ᑯᑦ ᑎᑭᑕᐅᓚᖓᔪᑦ SpaceX-ᑯᑦ ᑲᑕᖓᓄᑦ ᐱᑐᒍᑎᓂᒃ ᑐᕌᕐᑎᓗᒋᑦ ᑰᑦᔪᐊᒧᑦ, ᐊᒻᒪᓗ ᓱᑲᑦᑐᔭᓂᒃ Starlink-ᒧᑦ ᐱᑐᒍᑎᓂᒃ ᑐᕌᕐᑎᓗᒋᑦ ᐊᐅᐸᓗᒻᒧᑦ, ᑲᖏᕐᓱᐊᓗᒃᔪᐊᒧᑦ, ᑲᖏᕐᓱᔪᐊᒧᑦ, ᑲᖏᕐᓱᒧᑦ, ᖁᐊᕐᑕᒧᑦ ᐊᒻᒪᓗ ᑕᓯᐅᔭᒧᑦ. ᑖᒃᑯᐊ ᐱᑐᒍᑏᑦ ᐱᑐᑦᓯᒪᐅᑎᕕᒻᒥᒃ ᐊᑐᕐᑎᓄᑦ ᑖᒃᑯᓇᓂ ᓄᓇᓕᓐᓂ ᓄᐃᑦᓯᓚᖓᔪᑦ ᑲᔪᓯᑦᓯᐊᑐᒥᒃ ᐊᑐᕈᓐᓇᓂᕐᒥᒃ ᓄᑖᓂᒃ ᓈᓚᒍᑎᓂᒃ 2025 ᐱᒋᐊᕐᖃᒥᓐᓂᖓᓂ ᐊᕐᖁᑎᖃᕐᑎᓗᒍ ᑕᒫᓂᒃᑯᑦ ᐃᕙᓘᔭᓄᑦ-ᐊᓂᕐᕋᒧᑦ ᐱᑐᑦᓯᒪᐅᑎᒍᑎᖏᓐᓂᒃ.
ᐅᓪᓗᒥᐅᔪᖅ, EAUFON ᑕᕆᐅᑉ ᐃᕐᖃᖓᑎᒍᑦ ᓈᓚᒍᓐᓇᐅᑏᑦ ᑕᓯᐅᔭᕐᔪᐊᒥ ᐃᑭᕋᓴᕐᔪᐊᒥᓗ ᓄᓇᓕᓐᓄᑦ ᐱᑐᑦᓯᒪᒍᑕᐅᓕᕇᕐᑐᑦ ᐊᖏᔪᓕᒐᕐᑐᒧᑦ, ᓱᑲᑦᑑᓱᓂ, ᐃᕙᓘᔭᓄᑦ-ᑕᑯᓐᓇᕈᑎᐅᑉ ᐱᑐᒍᑎᖓᓄᑦ.
ᑕᒫᓂ – ᖃᐅᔨᓲᑦ ᓄᑖᓂᒃ ᐱᒍᑦᔨᓯᐊᕐᓂᓴᐅᒍᑎᑦᓴᓂᒃ ᐃᓕᑦᓯᓂᒃ.
ᐱᐅᓯᒋᐊᕐᑕᐅᓂᖏᑦ ᖃᕆᑕᐅᔭᒃᑰᑎᑦᓯᐅᑎᓄᑦ ᑭᒡᒐᑐᕈᑏᑦ ᓄᓇᕕᒻᒥ
ᑰᑦᔪᐊᖅ, ᑯᐯᒃ, ᐊᐅᒍᓯᑎ 23, 2018 – ᔨᐊᓂᕙ ᒪᓂᒃ, ᑲᑎᕕᒃ ᓄᓇᓕᒫᑦ ᑲᕙᒪᖓᑕ (ᑫᐋᔩᑉ) ᑐᑭᒧᐊᑦᑎᓯᔨᖓ, ᐊᒻᒪᓗ ᔅᑎᐊᕓᓐ ᓚᐅᔪᓐ, ᐱᖁᔭᓕᐅᕐᕕᒥ ᐊᓪᓚᑎ ᑎᒥᑎᒍᑦ ᐱᓕᐅᑎᓂᓕᕆᓂᕐᓄᑦ ᐊᒻᒪᓗ ᑭᓇᓕᒫᒃᑯᓄᑦ ᑎᒥᒥᒍᑦ ᐃᓗᓯᕐᓗᑐᓄᑦ, ᑭᒡᒐᑐᕐᓱᒍ ᓯᕗᓕᕐᑎᒪᕆ ᓇᕝᑏᑉ ᐯᓐᔅ, ᑐᕐᖃᑕᕐᕕᒃ ᓄᑖᔦᑦ ᓄᐃᑎᕐᑕᐅᓂᖏᓐᓄᑦ, ᓱᑯᐃᔦᓂᕐᓄᑦ ᐊᒻᒪᓗ ᒪᑭᑕᒐᓱᐊᕐᓃᑦ ᐱᕙᓪᓕᐊᓂᖏᓐᓄᑦ, ᑐᓴᕐᑎᓯᓚᐅᕐᑑᒃ ᑰᑦᔪᐊᒥ ᑳᓇᑕᐅᑉ ᑲᕙᒪᖓᑕ ᑐᓂᕐᕈᑎᖏᓐᓂᒃ ᑫᐋᔩᑉ ᑕᒫᓂ ᖃᕆᑕᐅᔭᒃᑰᑎᑦᓯᐅᑏᑦ ᐱᓇᓱᐊᕐᑕᐅᔪᑦ 5-ᒍᒍᑎᖓᓄᑦ ᐱᓇᓱᒐᕐᒧᑦ. ᑐᓂᕐᕈᑏᑦ ᐱᔭᐅᑎᑕᐅᓚᐅᕐᑐᑦ ᐊᕐᖁᑎᒋᑦᓱᒍ ᐱᑑᕐᑐᐃᓂᕐᓄᑦ ᓄᑖᓂᒃ ᓄᐃᑦᓯᒍᑎᓄᑦ ᐱᓇᓱᒐᖅ ᑮᓇᐅᔭᖃᕐᑎᓯᓛᓕᕐᑎᓗᒍ 50-ᖏᓐᓂᒃ ᐊᑭᖏᑦᑕ ᐃᓕᖓᔪᑦ $125-ᒥᓕᐊᕌᕐᑐᒧᑦ ᐱᓇᓱᒐᕐᒧᑦ. ᓅᕕᒻᐱᕆ 2017-ᒥ, ᑯᐯᑉ ᑲᕙᒪᖓ, ᐊᕐᖁᑎᒋᑦᓱᒍ Société du Plan Nord, ᐅᖃᓪᓚᕆᐅᑎᖃᕐᓯᒪᑎᓪᓗᒍ ᐱᓇᓱᒐᐅᑉ ᐊᑭᖏᑦᑕ ᖁᑉᐸᖏᓐᓂᒃ ᐊᑭᓖᓛᕐᓂᐊᓂᖓ.
“ᑖᓐᓇ ᑫᐋᔩᑉ ᑕᒫᓂ ᐱᓇᓱᒐᖓ ᓄᐃᑦᓯᒍᑕᐅᓛᕐᑐᖅ ᓱᑲᓐᓂᓴᓂᒃ ᐊᒻᒪᓗ ᐱᐅᓂᕐᓴᓂᒃ ᖃᕆᑕᐅᔭᒃᑰᑎᑦᓯᐅᑎᓄᑦ ᑭᒡᒐᑐᕐᑕᐅᒍᑎᖏᓐᓂᒃ ᐃᓄᖏᑦᑕ, ᐱᓇᓱᕝᕖᓗ ᐊᒻᒪᓗ ᑲᕙᒪᒃᑯᓂᒃ ᑭᒡᒐᑐᕐᑐᑦ ᐊᑐᕐᑏᑦ,” ᓚᓚᐅᕐᑐᖅ ᔨᐊᓂᕙ. “ᐃᑯᓪᓚᑎᕆᐅᑎᐅᓛᕐᑐᖅ ᐊᑐᕐᓗᒋᑦ ᑭᓯᐊᓂᐅᕙᑦᑐᓂᒃ ᐊᑭᑐᔪᓂᒃ ᖁᒻᒧᐊᑎᑕᐅᓯᒪᔪᒃᑯᑦ ᖃᕆᑕᐅᔭᒃᑰᕈᓐᓇᐅᑎᓂᒃ ᐊᒻᒪᓗ ᒥᑭᓪᓕᑎᕆᐅᑕᐅᓗᓂ ᖃᕆᑕᐅᔭᒃᑰᑎᑦᓯᐅᑎᑎᒍᑦ ᐊᕕᑦᓯᒪᓗᐊᕐᓂᖓᓂᒃ ᑕᕐᕋᒥᐅᑦ ᐊᒻᒪᓗ ᓯᕿᓂᕐᒥᐅᑦ.”
ᑫᐋᔩ ᑕᒫᓂ ᖃᕆᑕᐅᔭᒃᑰᑎᑦᓯᐅᑎᓄᑦ ᐱᓇᓱᐊᕐᑕᐅᔪᑦ 5-ᒍᒍᑎᖓᓄᑦ ᐱᓇᓱᒐᖅ ᐃᓕᐅᕐᙯᓂᐅᓛᕐᑐᖅ ᑕᕆᐅᑉ ᐃᕐᖃᖓᑎᒎᕐᑐᓂᒃ ᐊᕐᖁᑎᓂᒃ ᑕᓯᐅᔭᕐᔪᐊᒥ ᐊᒻᒪᓗ ᑕᓪᓕᒪᓂᐅᓐᓃᑦ ᓄᓇᕕᒻᒥ ᓄᓇᓕᓐᓂᒃ ᓱᑲᑦᑐᓂᒃ ᖃᕆᑕᐅᔭᒃᑰᕈᓐᓇᐅᑎᑖᕐᑎᓯᒍᑕᐅᓗᓂ. ᓱᑲᑦᑐᐃᓗ ᖃᕆᑕᐅᔭᒃᑰᕈᓐᓇᑎᑦᓯᐅᑏᑦ ᐱᑐᑦᑕᐅᓛᕐᓱᑎᒃ ᑰᑦᔪᐊᒥᑦ ᓯᐊᕙᕕᐊᓪᒧᑦ. ᐃᓕᐅᕐᖃᑕᐅᓂᖏᑦ ᓄᓇᓕᓐᓂ ᐳᓪᓚᐅᔮᐱᑦᑕᓕᓐᓂᒃ ᐊᕐᖁᑎᖃᕐᑎᓯᐅᑏᑦ ᐱᑐᑦᓯᒪᑎᑦᓯᒍᑎᖏᑦᑕ ᐱᔭᕇᕐᑕᐅᓛᕐᒥᔪᑦ ᐃᓘᓐᓀᓂ ᓄᓇᕕᒻᒥ ᓄᓇᓕᓐᓂ.
“ᑕᕐᕋᖓᓃᑦᑐᓄᑦ ᑯᐯᑉ ᓄᓇᓕᓐᓄᑦ, ᐃᑯᒪᐅᑎᐊᕈᓖᑦ ᑮᓇᐅᔭᕐᑕᓯᔭᐅᓂᖏᑦ ᐊᕐᖁᑎᒋᓗᒍ ᐱᑑᕐᑐᐃᓂᖅ ᓄᑖᔭᕐᓂᒃ ᓄᐃᑎᕆᓂᕐᓄᑦ ᐱᓇᓱᒐᖅ ᐱᕙᓪᓖᓯᐊᕈᑕᐅᓚᖓᔪᖅ ᐃᑲᔪᕐᓯᒍᑕᐅᓗᓂ ᓄᓇᓕᓃᑦᑐᓂᒃ ᖃᑦᓯᑐᐃᓐᓇᓂᒃ ᐅᑭᐅᓕᓐᓂᒃ,” ᓚᓚᐅᕐᑐᖅ ᓚᐅᔪᓐ. “ᑕᒪᒃᑯᐊ ᐃᓚᒋᔭᐅᔪᑦ ᑲᕙᒪᑦᑕ ᐸᕐᓀᒍᑎᖏᓐᓄᑦ ᐃᑲᔪᕐᓯᐅᑎᐅᑎᓪᓗᒋᑦ ᓄᐃᑎᕐᑕᐅᓂᖏᓐᓄᑦ ᐱᕕᑦᓭᑦ ᐃᓘᓐᓀᓂ ᓄᓇᓕᓐᓂ, ᐃᓚᐅᑎᓪᓗᒋᑦ ᓄᓇᓕᐅᖃᑎᒥᓂᒃ ᐅᖓᓯᑦᑕᓕᒻᒦᑐᑦ ᑕᕐᕋᒥ.”
“ᐊᑐᕈᓐᓇᑎᑕᐅᓂᖅ ᓱᑲᑦᑐᓂᒃ ᖃᕆᑕᐅᔭᒃᑰᑎᑦᓯᐅᑎᓂᒃ ᐱᔭᐅᒍᓐᓇᕆᐊᖃᖕᖏᑐᖅ ᐊᑦᓱᐃᑐᓄᑦ ᑭᓯᐊᓂ; ᑌᒣᑦᑐᖃᑦᓯᐊᓗᑎᒃ ᑭᓯᐊᓂᐅᓕᕐᒪᑕ ᓇᓂᓕᒫᖅ,” ᑌᒫᒃ ᐅᖃᓚᐅᕐᑐᖅ ᐯᓐᔅ ᐊᓪᓚᓯᒪᔪᕐᓃᑎᓗᒋᑦ ᓱᕐᖁᐃᓯᑎᑦᓯᐅᑎᒥᓂ. “ᓱᑲᑦᑐᓂᒃ ᖃᕆᑕᔭᒃᑰᑎᑦᓯᒍᑎᓂᒃ ᑭᒡᒐᑐᕈᑎᖃᕐᓃᑦ ᓴᓇᕐᕈᑎᑦᓴᔭᐅᓕᕐᒪᑕ ᐃᓘᓐᓀᓄᑦ
ᑳᓇᑕᒥᐅᓄᑦ ᒪᓂᔭᐅᒪᒋᐊᖃᓕᕐᓱᑎᒃ, ᓄᓇᖃᕋᓗᐊᕐᐸᑕ ᓇᓂᑐᐃᓐᓇᖅ. ᓄᓇᓕᕗᑦ ᑌᒣᑦᑐᓂᒃ ᑭᒡᒐᑐᕈᑎᓂᒃ ᑭᖕᖒᒪᑦᓯᒪᑕ ᐱᓇᓱᐊᕐᐸᒋᐊᖃᕐᓂᒥᓄᑦ ᑮᓇᐅᑦᔭᕋᓱᐊᕐᕕᓂ, ᐱᓇᓱᕝᕕᒥᓂ, ᐃᓕᓴᕐᓯᒪᓂᕐᒥᓂᓗ ᓄᑕᐅᓪᓕᑎᕇᓐᓇᐸᒋᐊᖃᕐᓱᑎᒃ ᐊᒻᒪᓗ ᓄᐃᑦᓯᕙᓪᓕᐊᓗᑎᒃ ᓲᓂᕐᓴᓂᒃ ᓄᓇᓕᓐᓂᒃ.”
ᑕᒫᓂ ᖃᕆᑕᐅᔭᒃᑰᑎᑦᓯᒍᑎᒃ ᐱᒋᐊᕐᑎᑕᐅᓯᒪᔪᖅ 2004-ᒥ ᓄᓇᕕᒻᒥ ᓯᕗᓪᓕᐸᐅᑦᓱᓂ ᓄᓇᓕᓕᒫᓂ ᓄᐃᑦᓯᒍᓐᓇᑎᑦᓯᐅᑎᖕᖑᓯᒪᑦᓱᓂ ᐊᒻᒪᓗ ᖃᕆᑕᐅᔭᒃᑰᑎᑦᓯᐅᑎᓄᑦ ᑭᒡᒐᑐᕐᑎᖑᕐᓱᓂ ᒪᓂᔨᓯᒪᔨᐅᓯᑦᓱᓂ. ᐃᓕᐅᕐᖃᑕᐅᓂᖏᑦ ᐱᑦᓯᐊᕈᓐᓇᑐᑦ, ᓱᒃᑯᑕᖕᖏᑐᑦ ᑕᕆᐅᑉ ᐃᕐᖃᖓᑎᒎᕐᑐᑦ ᐊᒻᒪᓗ ᓄᓇᒥ ᐳᓪᓚᐅᔮᐱᑦᑕᓖᑦ ᖃᕆᑕᐅᔦᑦ ᐊᕐᖁᑎᖏᑦᑕ ᐱᖁᑎᒻᒪᕆᑦᑕᖏᑦ ᓄᓇᕕᒻᒥᒃ ᐃᓚᒋᔭᐅᓪᓚᕆᒍᓐᓇᓯᑎᑦᓯᓚᖓᔪᑦ ᐃᑯᒪᐅᑎᐊᕈᕐᓄᑦ ᓄᑖᔭᓄᑦ ᐱᓇᓱᐊᕈᓐᓇᐅᑎᑖᕐᐸᓕᐊᔪᓄᑦ.
ᑐᑭᓯᒋᐊᓪᓚᕕᑦᓴᖅ:
ᔪᓕᐊᓐ ᕕᐅ-ᐱᑎᑦ
ᑐᓴᐅᒪᐅᑎᓕᕆᓂᕐᓂᒃ ᑲᔪᓯᑎᑦᓯᔨ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᐅᖄᒍᑎᖓ 819-964-2961, ext. 2388
media@krg.ca | www.krg.ca
ᑲᑎᕕᒃ ᓄᓇᓕᓕᒫᑦ ᑲᕙᒪᖓ (ᑫᐋᔩ) 1978-ᒥ ᑎᒥᖕᖑᑎᑕᐅᓯᒪᔪᖅ ᐃᓄᓐᓄᐊᖓᔪᖅ ᐃᓕᒃᑰᑎᕐᑎᓯᒐᓂ, ᐊᑖᒎᕐᓱᓂ ᔦᒥᔅ ᐯ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒌᒍᑎᐅᑉ, ᑖᓐᓇ ᑎᒥ ᐊᖓᔪᕐᖃᐅᕕᖃᕐᐳᖅ ᑯᐯᑉ ᑕᕐᕋᖓᑕ ᓄᓇᓕᒫᑲᓵᖓᓂᒃ 55 ᖁᓛᓂ ᐱᑦᔪᑎᒋᓗᒋᑦ ᓄᓇᓖᑦ ᑲᒪᒋᔭᖃᕐᓂᖏᑦ, ᐃᖏᕐᕋᐅᑎᓕᕆᓂᖅ, ᐊᕙᑎ, ᐳᓖᓯᖃᕐᓂᖅ, ᐱᓇᓱᒐᑦᓴᓕᕆᓂᖅ, ᐱᓇᓱᒋᐅᕐᓴᑎᑦᓯᓂᖅ, ᓂᕐᓯᑕᐅᑦᑕᑐᓕᕆᓂᖅ, ᐯᕆᑦᓯᕕᖃᕐᑎᓯᓂᖅ, ᓄᑕᐅᓪᓕᕈᓐᓇᑐᓕᕆᓂᖅ, ᓄᓇᐅᑉ ᐊᑐᕐᑕᐅᓂᖓᓄᑦ ᐸᕐᓀᒍᑎᓕᐅᕐᓂᖅ, ᐃᓄᓐᓂᒃ ᐊᑦᑕᓀᑦᑐᒦᑦᑎᓯᓂᖅ ᐊᒻᒪᓗ ᐱᕙᓪᓕᐊᑎᑦᓯᓂᖅ ᒪᑭᑕᒐᓱᐊᕈᑎᓂᒃ. 2004-ᒥᓂᑦ, ᑫᐋᔩ ᑲᒪᒋᔭᖃᓪᓚᕆᑦᓯᒪᓕᕐᑐᖅ ᒪᓂᔨᓯᒪᔨᐅᑦᓱᓂ ᐱᔪᓐᓇᓯᐊᕐᑐᓂᒃ ᖃᕆᑕᐅᔭᒃᑰᑎᑦᓯᐅᑎᓄᑦ ᑭᒡᒐᑐᕈᑎᓂᒃ ᓄᓇᕕᒻᒥ ᓄᓇᓕᓐᓂᒃ ᐊᕐᖁᑎᒋᑦᓱᒍ ᑕᒫᓂ ᖃᕆᑕᐅᔭᒃᑰᑎᑦᓯᒍᑎᒃ.
ᐃᕙᓘᔭᒧᑦ ᑕᑯᓐᓇᕈᑎᓖᑦ ᐅᕝᕙᓘᓐᓃᑦ LTE ᐊᐅᓪᓚᑎᑦᓯᒍᑏᑦ: ᖃᓅᖅ ᐊᑦᔨᒌᖕᖏᓚᑦ?
ᑕᒫᓂᒃᑯᑦ ᐅᓪᓗᒥ ᒪᓂᔨᓯᒪᕗᑦ ᐱᐊᓚᓂᕐᓴᒥᒃ ᐱᑐᒍᑎᒥᒃ ᐊᑐᕐᑎᓗᒍ ᐃᕙᓘᔭᒧᑦ ᑕᑯᓐᓇᐅᑎᓕᓐᓂᒃ ᐅᕝᕙᓘᓐᓃᑦ LTE-ᓂᒃ ᓴᓇᒻᒪᓕᓐᓂᒃ ᐊᐅᓚᑎᑦᓯᒍᑎᓂᒃ. ᑭᓯᐊᓂ, ᖃᓅᖅ ᑖᒃᑯᐊ ᒪᕐᕈᐃᑦ ᐊᑦᔨᒌᖕᖏᓚᑦ?
ᐃᕙᓘᔭᒥᒃ ᑕᑯᓐᓇᐅᑎᓕᒃ
ᐃᕙᓘᔭᓂᒃ ᑕᑯᓐᓇᐅᑎᓖᑦ ᐱᑐᑦᓯᒪᐅᑎᔪᑦ ᑲᓱᕈᑕᐅᕗᑦ ᕿᑎᕐᓯᐹᓂᒃ ᐃᓂᓕᐅᕐᓯᒪᔪᓄᑦ ᐃᓱᐊᖁᑎᑦᑎᓄᑦ ᐊᒻᒪᓗ ᐊᒥᓲᓂᕐᓴᓄᑦ ᐃᓄᐃᑦ ᐃᓪᓗᖏᓐᓄᑦ ᐊᒻᒪᓗ ᐃᓪᓗᔪᐊᓄᑦ ᓄᓇᓕᐅᑉ ᓇᓪᓕᐊᑕ ᐃᓗᐊᓂ. ᑕᑯᓐᓇᕈᑎᓄᑦ ᐱᑐᑦᓯᒪᐅᑎᕕᐅᑉ ᐱᒋᐊᕐᕕᖓ (O.N.T.), ᐃᕙᓘᔭᒥᒃ ᑕᑯᓐᓇᐅᑎᓕᒃ ᐊᐅᓪᓚᑎᑦᓯᒍᑎ, ᐱᑐᑦᑎᓯᔪᖅ ᐃᓪᓗᓯᓐᓂᒃ ᐅᕝᕙᓘᓐᓃᑦ ᐃᓪᓗᔪᐊᓯᓐᓂᒃ ᐃᕙᓘᔦᑦ ᑕᑯᓐᓇᐅᑏᑦ ᐱᑐᑦᓯᒪᐅᑎᓂᖓᓄᑦ. ᑖᓐᓇ ᐃᕙᓘᔭᓄᑦ ᑕᑯᓐᓇᐅᑎᓄᑦ ᐊᐅᓪᓚᑎᑦᓯᒍᑎ ᑌᒪᖕᖓᐅᓂᕐᓴᖅ ᐃᓂᖃᓲᖑᕗᖅ ᐃᓪᓗᓯ ᐃᓗᐊᓂ ᐅᕝᕙᓘᓐᓃᑦ ᐃᓪᓗᔪᐊᑉ ᐊᐅᓚᔫᓕᖃᐅᑎᖓᓂ. ᑖᓐᓇ ᐃᕙᓘᔭᒥᒃ ᑕᑯᓐᓇᐅᑎᓕᒃ ᐊᐅᓪᓚᑎᑦᓯᒍᑎ ᐊᑐᓲᖅ ᓇᓪᓕᐊᓂᒃ ᐅᐊᔭᖃᖕᖏᑐᒥᓪᓘᓃᑦ ᐃᓚᐅᒌᕐᑐᒥᒃ ᑐᕌᕐᑎᓯᒍᑎᓕᒻᒥᒃ, ᐅᕝᕙᓘᓐᓃᑦ ᐊᑭᓐᓇᒥ ᑲᑉᐳᑎᕕᒻᒥᒃ ᑲᓱᕈᑕᐅᑎᓪᓗᒍ ᖃᕆᑕᐅᔭᕐᓅᕕᑦ.
ᐃᕙᓘᔭᓄᑦ ᑕᑯᓐᓇᐅᑎᓄᑦ ᐱᑐᑦᓯᒪᐅᑎᒍᑎ ᐆᑦᑐᕋᐅᑎᓪᓗᐊᖑᕗᖅ ᐅᖃᓕᒪᐅᑏᑦ ᐅᕝᕙᓘᓐᓃᑦ ᑕᕐᕋᓕᔮᕈᑏᑦ ᐱᑐᑦᓯᒪᐅᑎᒍᑎᖓᓄᑦ, ᑭᓯᐊᓂ ᓄᑖᖑᓂᕐᓴᐅᓱᓂ. ᑲᓐᓄᔭᒥᒃ ᐅᐊᔭᒥᒃ ᐊᑐᕈᓐᓀᓱᓂ, ᐱᑐᑦᓯᒪᐅᑎᒍᑎ ᐊᑐᖔᕐᑐᖅ ᐃᕙᓘᔭᓂᒃ ᑕᑯᓐᓇᕈᑎᓕᒻᒥᒃ ᐊᑦᓱᓈᒥᒃ ᓇᑦᓴᕈᑎᒋᑦᓱᒍ ᐃᑯᒪᐅᒻᒨᑐᑦ ᐊᐅᓪᓚᑎᑕᖏᓐᓂᒃ. ᑖᓐᓇ ᐊᐅᓪᓚᑎᑕᐅᔪᖅ ᐊᐅᓪᓚᓲᖑᕗᖅ laser-ᒥᒃ ᐃᑯᒪᒥᒃ ᐊᑐᕐᓱᓂ ᐊᕐᖁᓵᕐᑎᓱᒍ ᐃᕙᓘᔭᐅᑉ ᐊᑦᓱᓈᖓᑎᒍᑦ. ᑌᒣᓕᖓᒻᒪᑦ, ᑕᒪᑐᒪ ᐱᕐᕈᓯᖓ ᒪᓂᔨᒍᑕᐅᕗᖅ ᐱᐅᓂᕐᓴᒥᒃ ᓱᑲᓐᓂᖃᕈᑎᒥᒃ ᐊᒻᒪᓗ ᓂᑲᓇᖕᖏᓂᕐᒥᒃ.
LTE ᐊᐅᓪᓚᑎᑦᓯᒍᑎ
LTE ᐊᐅᓪᓚᑎᑦᓯᒍᑏᑦ ᐱᑐᓲᖑᕗᑦ LTE ᓇᐸᔪᖏᓐᓄᑦ ᐊᑐᓂ ᓄᓇᓕᓐᓂ ᐅᐊᔭᖃᕈᓐᓀᑎᓪᓗᒍ. ᐊᑐᓂ ᑌᒣᑦᑐᐃᑦ ᐊᐅᓪᓚᑎᑦᓯᒍᑏᑦ ᐃᓚᐅᒌᕐᑐᒥᒃ ᐊᐅᓪᓚᕈᑎᖃᓲᑦ, ᐱᑎᑦᓯᑎᓪᓗᒍ ᐊᑐᕐᑎᖓᑕ ᐅᐊᔭᖃᖕᖏᑐᒥᒃ ᓂᕈᐊᕈᓐᓇᓂᖓᓂᒃ, ᐊᒻᒪᓗ LAN-ᓂᒃ ᑲᑉᐳᑎᕕᖃᕐᒥᓱᑎᒃ ᓴᓂᕌᒍᑦ ᑕᒡᒍᖓ ᑐᕃᓐᓇᓗᑎᑦ ᑲᑉᐳᑎᒍᒪᑦᓴᓂᐊᕈᕕᑦ.
LTE-ᓄᑦ ᐱᑐᑦᓯᒪᐅᑏᑦ ᑕᖏᖃᕐᑎᑕᐅᔪᑦ ᓇᐸᔪᓄᑦ ᐊᑐᓂ ᓄᓇᓖᑦ ᐃᓗᐊᓂ. ᑖᒃᑯᐊ LTE ᐊᐅᓪᓚᑎᑦᓯᒍᑎᖏᑦᑕ ᓇᐸᔪᖏᑦ ᐅᖓᓯᓐᓂᓴᒨᕈᓐᓇᒪᑕ, ᐃᑭᓐᓂᓭᑦ ᐊᑐᕆᐊᖃᓲᖑᓕᕐᑐᑦ (ᐆᑦᑑᑎᒋᑦᓱᒍ ᓯᕗᓪᓕᐅᓚᐅᔪᔪᓄᑦ ᐱᑐᑦᓯᒪᐅᑎᓄᑦ). ᑌᒣᒻᒪᑦ, ᐃᓚᐅᕐᑑᑎᒌᑦ ᒪᑭᑕᑎᒋᐊᓖᑦ ᐃᑭᓐᓂᓴᐅᒻᒪᑕ, ᑖᒃᑯᐊ LTE-ᒥᒃ ᓴᓇᒻᒪᓖᑦ ᓂᑲᓇᖕᖏᓂᕐᓴᐅᒥᔪᑦ. ᐊᑐᓂ ᓇᐸᔪᖅ ᐱᕕᖃᕐᑎᓯᒻᒥᔪᖅ ᐊᒥᓲᓂᕐᓭᑦ ᐊᑕᐅᑦᓯᑯᑦ ᐱᑐᑦᓯᒪᐅᑎᒃᑰᓂᖓᓂᒃ, ᑕᒪᓐᓇᓗ ᑐᑭᖃᕐᓱᓂ ᓱᑲᓐᓂᓴᐅᓂᖓᓂᒃ ᐃᓚᖃᕐᒥᑎᓪᓗᒍ ᓂᑲᓇᖕᖏᓂᕐᓴᐅᓂᕐᒥᒃ.
ᐅᖃᕆᐊᑭᓈᕐᓱᒍ, ᑕᒫᓂᒃᑯᑦ ᐊᑐᓲᖑᕗᑦ ᒪᕐᕈᐃᓂᒃ ᓴᓇᒻᒪᓕᓐᓂᒃ ᐱᐅᒡᒍᑎᓂᒃ ᐱᒍᑎᒋᑦᓱᒋᑦ ᑖᑦᓱᒥᖓᑦᓭᓇᖅ ᐱᔪᔭᒥᓂᒃ: ᐱᐊᓚᓂᕐᓴᐅᓱᓂ ᖃᕆᑕᐅᔦᑦ ᐱᑐᕝᕕᖓᑕ ᐱᑦᔪᔨᓂᖓᓂᒃ.