ᑐᓴᕈᑏᑦ
ᐱᒋᐊᕐᑎᑕᐅᓯᒪᑦᓱᓂ 2004-ᒥ, ᑕᒫᓂ ᖃᕆᑕᐅᔦᑦ ᐱᑐᕝᕕᖓᓄᑦ ᐱᑦᔪᔨᕕᒃ, ᐃᓚᐅᕗᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ (KRG). ᓄᐃᑕᑦᓯᔪᖅ ᓄᑖᔭᓂᒃ ᓱᑲᑦᑐᔭᓂᒃ (ᐅᐊᔭᖃᖕᖏᑐᓂᒃ) ᖃᕆᑕᐅᔦᑦ ᐱᑐᕝᕕᖓᓄᑦ ᐱᑦᔪᔨᒍᑎᓂᒃ 14-ᓄᑦ ᐃᓛᒃᑰᑐᓄᑦ ᓄᓇᕕᒻᒥ ᓄᓇᓕᓐᓄᑦ, ᐱᖓᓱᐃᑦ ᐊᑦᔨᒌᖕᖏᑐᑦ ᓄᓇᓕᑐᙯᑦ ᓄᓇᖏᓐᓄᑦ, 150-ᓄᓪᓗ ᓄᓇᓕᓐᓂ ᖃᑭᓴᐅᑎᓄᑦ ᑎᒥᐅᔪᓄᓪᓗ ᐊᒻᒪᓗ 1,800 ᐅᖓᑖᓃᑦᑐᓄᑦ ᐃᓪᓗᒥᓂ ᐊᑐᕐᑎᓄᑦ.
ᑲᔪᓯᔪᒥᒃ ᐃᑲᔪᕐᑕᐅᓂᕐᒥᓄᑦ ᐱᓇᓱᐊᒐᖃᕐᓂᖅ ᑳᓇᑕᒃᑯᑦ ᓈᓚᐅᑎᓕᕆᔨᖏᓐᓄᑦ ᑳᓇᑕᒥ ᐊᒻᒪᓗ ᑯᐯᒃᑯᑦ ᑲᕙᒪᖓᓄᑦ ᑖᒃᑯᐊ ᐊᕐᖁᑎᖃᕐᑎᓗᒋᑦ ᑮᓇᐅᔭᖃᐅᑎᒥᒃ ᐃᓕᖓᔪᓂᒃ ᑲᔪᓯᑎᑦᓯᓂᕐᒧᑦ ᐱᒋᐊᕐᑎᑕᐅᔪᓂᒃ ᓄᓇᓕᓕᒫᓂ ᐊᒻᒪᓗ ᓄᓇᓕᓐᓂ, KRG-ᑯᑦ ᑲᑦᓱᙰᒍᑎᖃᑦᓯᐊᑐᑦ ᓱᕐᖁᐃᓯᒪᓂᕐᒥᒃ ᓇᓗᕐᖁᓇᖕᖏᑐᓂᒃ ᖃᕆᑕᐅᔦᑦ ᐱᑐᕝᕕᖓᓄᑦ ᐱᑦᔪᔨᒍᑎᓂᒃ ᐱᑕᖃᕆᐊᖓ ᓄᓇᕕᒻᒥᐅᓄᑦ.
ᑕᒫᓂ ᖃᕆᑕᐅᔦᑦ ᐱᑐᕝᕕᖓ ᐊᒻᒪᓗ ᐃᓚᒋᓕᐅᑎᕋᑖᖏᑦ ᐊᑦᔨᒌᖕᖏᑐᑦ-ᑐᓴᕈᑏᑦ ᖃᓂᖕᖏᑐᒥᒃ ᐱᑐᑦᓯᒪᐅᑎᖏᑦ ᓴᓇᖏᓐᓇᑐᑦ ᑭᓯᑦᓴᐅᖏᑦᑐᓂᒃ ᒪᑭᑕᐅᑎᖃᕐᓂᑯᑦ ᐃᓅᖃᑎᒌᓐᓂᑯᓪᓗ ᐱᕙᓪᓕᖁᑎᓂᒃ ᓄᓇᕕᒻᒥᐅᓄᑦ ᐊᕐᖁᑎᖃᕐᑎᓗᒋᑦ ᓄᑖᓂᒃ ᖃᑭᓴᐅᑎᓂᒃ ᐱᒋᐊᕐᑎᓯᒍᑎᑦᓴᓂᒃ, ᐊᑐᓪᓗᑐᕆᐊᓕᓐᓂᓗ ᐊᑐᐃᓐᓇᓯᒍᓐᓇᓂᕐᒥᒃ ᐅᖓᓯᑖᓂᒃ ᐋᓐᓂᐊᓯᐅᕈᑎᓂᒃ ᐊᒻᒪᓗ ᐅᖓᓯᑖᓂᒃ ᐃᓕᓐᓂᐊᕈᑎᓂᒃ, ᓱᓕ ᐊᑕᐅᑦᓯᑯᑦ ᑲᓱᕈᑕᐅᒻᒥᓱᓂ ᖃᓄᐃᑦᑐᑐᐃᓐᓇᓂᒃ ᐃᓗᕐᖁᓯᓕᓐᓄᑦ, ᑕᐅᑐᒍᓯᓕᓐᓄᑦ ᐊᒻᒪᓗ ᐃᓅᓯᑦᓴᔭᓕᓐᓄᑦ ᑳᓇᑕᐅᑉ ᐅᑭᐅᕐᑕᑐᑦᓯᐊᕌᓗᐊᓂ ᓇᓂᑐᐃᓐᓇᒥᐅᓄᑦ ᓯᓚᕐᔪᐊᒥ.